Досега, до 9 часот, во вториот круг на локалните избори во Македонија гласаа 22.379 граѓани, што одговара на 2,88 отсто од запишаните гласачи, објави на прес-конференција претседателот на Државната изборна комисија (ДИК) Борис Кондарко. На ниво на Град Скопје излезноста до истиот час е 2,46 отсто.
– „Гласачките места се навреме и уредно отворени, гласањето тече во најдобар ред. Постапката се одвива уредно, немаме никаков проблем досега со изборниот материјал ниту со постапувањето на избирачките одбори“, рече Кондарко.
Единствено во Дојран, на избирачкото место 0385, поради технички проблем со смарт-картичка на уредот за биометриска идентификација, имало краток застој, кој е веќе решен, и гласањето продолжува непречено.
Кондарко истакна дека тимови на ДИК во текот на денот ќе посетуваат избирачки места и општински изборни комисии без претходна најава, со цел да го набљудуваат текот на изборите. И по затворањето на гласачките места во 19 часот, ДИК ќе има тимови кои ќе го следат броењето на гласовите за поголема транспарентност.
– „ДИК и во текот на денов е во постојана комуникација со Комисијата за следење на изборниот процес од Јавното обвинителство, од превентивни причини. Доколку има потреба, уште во текот на гласањето или броењето ќе известуваат и ќе доставуваат доверлив изборен материјал“, додаде Кондарко.
Во вториот круг денеска се гласа за градоначалници во 32 општини и во Градот Скопје, на 1.771 избирачко место. Право на глас имаат 1.013.375 граѓани, меѓу кои 474.304 во Скопје.
Следната прес-конференција на ДИК е закажана за 11:30 часот, а првичните неофицијални резултати ќе бидат објавени по 20 часот. Околу 23 часот ќе се одржи и нова прес-конференција со дополнителни информации.