Во четири општини – Гостивар, Врапчиште, Центар Жупа и Маврово и Ростуше – денеска нема да се одржи гласање поради недоволниот одзив на граѓаните во првиот круг на Локалните избори 2025.
Според Државната изборна комисија (ДИК), во овие општини не е постигната законската излезност од најмалку една третина (33,33%) од запишаните гласачи, услов за да се сметаат изборите за успешни. Во Гостивар излезноста беше 33,31%, во Врапчиште – 25,18%, во Маврово и Ростуше – 30,31%, а во Центар Жупа – 21,49%.
Согласно член 132 став (2) од Изборниот законик, во вакви случаи се повторува целата изборна постапка. Повторените избори ќе се одржат во рок од 60 дена од објавувањето на конечните резултати, без повторно условување со цензусот од една третина, како што предвидува член 132-а.
Во меѓувреме, денеска се гласа во 32 општини и во Градот Скопје, каде се одржува вториот круг за избор на градоначалници. Во првиот круг избор беше извршен во 44 општини.