Голема кражба на електрична енергија е откриена во хотел со четири ѕвезди во центарот на Скопје, соопштија од Електродистрибуција. Нелегалниот приклучок претставувал и огромна опасност од пожар.
Измамата била откриена при техничка контрола во станбена зграда која граничи со хотелот лоциран на улицата „Луј Пастер“. Екипите на Електродистрибуција пронашле три нелегални и изгорени кабли, што било последица на преголема оптовареност.
„Каблите веднаш беа исклучени бидејќи претставуваа директна и огромна општа опасност од настанување на пожар. За време на дополнителна контрола се утврди дека хотелот повторно бил приклучен на еден од нелегалните кабли“, се вели во соопштението.
Од компанијата додаваат дека нивните екипи биле попречени во вршењето на должноста при обидот да влезат во хотелскиот објект.
Случајот е целосно документиран и за него е поднесена соодветна пријава до Министерството за внатрешни работи.
„Случајот е документиран и за истиот е поднесена Пријава за нелегално приклучување на мрежа и предизвикување на општа опасност од пожар до Министерството за внатрешни работи“, соопштија од Електродистрибуција.