Директорот на ЈП „Комунална хигиена“, Сабахудин Рустеми, поднел неотповиклива оставка од функцијата за време на распитот во Кривичниот суд, соопшти неговиот адвокат Асмир Алиспахиќ.
„На барање на мојот клиент, јавно информирам дека тој пред судијата на претходна постапка поднесе неотповиклива оставка од позицијата в.д. директор на ‘Комунална хигиена’. Станува збор за морален чин, со кој Рустеми сака да покаже дека нема намера да ја попречува истрагата на кој било начин“, изјави Алиспахиќ.
Адвокатот додаде дека одлуката за оставка е донесена по консултација со бранителите, со цел истрагата да се води непречено и да се докаже дека неговиот клиент нема поврзаност со делото.
„Рустеми не влијаел, ниту можел да влијае врз истрагата. Убедени сме дека ќе се докаже дека нема никаква основа за обвинението што му се става на товар“, рече Алиспахиќ, појаснувајќи дека станува збор за кривично дело по член 230 од Кривичниот законик – „загрозување на животната средина и природата со отпад“, кое, според него, ретко се среќава во домашната пракса, а со измените од 2023 година добило поширок опсег.
Адвокатот посочи и дека Рустеми, кој бил именуван за директор во февруари 2025 година, барал од Управниот и Надзорниот одбор да се зголемат ресурсите и механизацијата во претпријатието, како и да се дозволат нови вработувања, но без успех.
Кривичниот суд вчера му одреди 30-дневен притвор на Рустеми и на управителот за отпад во претпријатието, Аки Саити, кој исто така е застапуван од Алиспахиќ. Тие се товарат за кривично дело од член 230 став 1 – загрозување на животната средина и природата со отпад.