Декарбонизацијата, енергетската ефикасност и обновливата енергија се моќни алатки за изградба на поиновативна, поотпорна и конкурентна економија, рече евроамбасадорот во земјава Михалис Рохас, на промоцијата на првиот водич за декарбонизација за малите бизниси во земјата, што се одржа денеска во Стопанската комора.
Рокас истакна дека Северна Македонија покажа силна посветеност преку својот Национален план за енергија и клима како визија каде што растот на бизнисот и одговорноста за климата одат рака под рака.
-Сега е време да се претвори оваа визија во акција, во сите сектори на економијата, а особено во индустријата и меѓу малите и средните претпријатија (МСП), ’рбетот на економијата на оваа земја. Доколку секое МСП преземе барем неколку значајни чекори кон позелени деловни практики, комбинираното влијание врз повеќе од 68.000 претпријатија ќе биде навистина трансформативно, заклучи тој.
Стопанската комора го изработи првиот водич за декарбонизација за малите бизниси во земјата со поддршка од Европската Унија. Дигиталната алатка обезбедува упатства чекор по чекор за најефикасните начини за низа локални компании за да го намалат својот јаглероден отпечаток како дел од светската борба против климатските промени.
Комората го изработи водичот во соработка со советодавниот тим на Европската инвестициска банка и делегацијата на ЕУ во Македонија. Бизнис-асоцијацијата е најстарата и најголемата стопанска комора во Северна Македонија. Алатката беше претставена денес во Скопје на конференција на која присуствуваа повеќе од 100 претприемачи од сите сектори на македонската економија.
-Водичот за декарбонизација претставува пресвртница во зелената транзиција на нашата земја, опремувајќи ги бизнисите со алатките што им се потребни за да дејствуваат сега, рече министерката за енергетика, рударство и минерални суровини, Сања Божиновска.
Водичот е дизајниран да им помогне на компаниите да ги намалат емисиите на стакленички гасови и да се адаптираат на меѓународните климатски правила, како што е данокот на ЕУ на увезените стоки со висока јаглеродна стапка – Механизмот за адаптација на јаглеродната граница (CBAM), а воедно да останат конкурентни. Тој ќе ѝ помогне на Македонија како целина да се движи кон економија со ниски емисии на јаглерод. Поставен на веб-страницата на Стопанската комора, водичот е во форма на интерактивна платформа и е создаден со финансирање од ЕИБ Глобално.
-Овој водич доаѓа во клучно време кога Северна Македонија напредува во својата зелена транзиција и се подготвува за претстојните регулативи за јаглерод, рече претставникот на ЕИБ, Бјорн Габриел, додавајќи дека се горди што ги поддржуваат бизнисите во модернизирањето на нивното работење и помагаат во спроведувањето одржлива трансформација низ целата земја.
Клучна карактеристика на платформата е калкулатор за јаглероден отпечаток што опфаќа речиси 60 извори на енергија и разладни средства. Исто така, достапни се информации за регулативите на ЕУ и домашните климатски регулативи, како и за можностите за финансирање како што се субвенциите. Понатаму, платформата презентира практични студии на случаи и приказни за успех од водечки компании за да ги истакне придобивките од чистата енергија.
ЕУ е долгогодишен партнер на земјава, помагајќи им на бизнисите да се подготват за пристапување и ефикасно да се натпреваруваат на европскиот единствен пазар.
Водичот е достапен на следниот линк: https://decarbonisation.mchamber.mk/.