Сакам да најавам дека подготвуваме специјален финансиски пакет за проекти во Општина Струмица, кои се дополнителни средства од оние кои Владата ги префрла преку повиците коишто се случија минатата и оваа година. Така што сите подготвени проекти, кои градоначалникот по изборот ќе ги понуди, ние сме подготвени да ги финансираме затоа што за тука ќе имаме специјален пакет, изјави денеска потпретседателот на ВМРО-ДПМНЕ, Александар Николоски, кој заедно со кандидатот за градоначалник на Струмица од ВМРО-ДПМНЕ и коалицијата, Петар Јанков и кандидати за советници имаа теренски активности за локалните избори.
„Денеска сме со активности во посета на општина Струмица. Веќе сме во финалето на изборната кампања, остануваат уште два дена. Се обидовме на искомуницираме со што повеќе луѓе, да допреме до што повеќе домови, да ја презентираме нашата програма и нашата визија која што значи економски препород на економијата, но исто така и бројни инвестиции, кои што за жал не можеа да се реализираат во изминатиов период“, вели Николоски.
Николоски, кој е вицепремиер и министер за транспорт и врски, најави и две големи инфраструктурни инвестиции.
„Првата е изградба на експресен пат што треба да оди од Радовиш до Струмица, како Струмица целосно би била поврзана со главниот град или со експресен пат и автопат. И втората е поврзување на двата паневропски коридори, Коридорот 10 од Македонија и Коридорот „Струма“ во Бугарија преку изградба на експресен пат кој ќе оди преку Смоквица, под Валандовско брдо, ќе излегува кај Куклиш, обиколница со Струмица, Ново Село-граница со Бугарија. Од другата страна Бугарија ќе треба да го заврши делот кој е од граница преку Петрич и спој на двата автопата. Тоа ќе значи дека голем дел од транспортот ќе се пренасочи токму преку овој спој на двата коридора“, рече Николоски.
Кандидадот за градоначалник на Струмица од ВМРО-ДПМНЕ и коалицијата, Петар Јанков, се заблагодари за досегашната поддршка и ги повика граѓаните на 19 октомври масовно да излезат и да го заокружат бројот 9 за да извојува голема победа за Струмица.