Со сослушување сведоци предложени од Јавното обвинителство, денеска во судницата во „Идризово“ продолжува судењето за пожарот во дискотеката „Пулс“ во Кочани, во кој загинаа 63 лица, а повеќе од 200 беа повредени.
На претходното рочиште беа сослушани двајца сведоци. Трајче Димишковски, кој од 2023 до август 2025 година бил дел од агенцијата за обезбедување „Рубикон“, сведочеше за начинот на комуникација меѓу вработените, распределбата на персоналот, како и за насоките што ги давал професорот Александар Нацев при поголеми настани и обуки за законските обврски на обезбедувачите.
Претходно исказ даде и инспектор од Дирекцијата за заштита и спасување од подрачното одделение во Виница. Тој посочи дека по пожарот во клубот „Пулс“ биле утврдени сериозни пропусти, меѓу кои недостиг на противпожарни апарати, нефункционален (празен) хидрант и заклучена помошна врата. Според неговото сведочење, Општина Кочани повеќе од десет години немала инспектор за заштита и спасување, а за вршење надзор во друга општина бил потребен писмен налог од надлежните.
Пожарот во дискотеката „Пулс“ во Кочани избувна на 16 март 2025 година, за време на настап на групата ДНК, и се смета за една од најтешките трагедии во поновата историја на земјата.
Со денешното рочиште продолжува доказната постапка, со изведување сведоци предложени од Обвинителството, кое го застапува тим од 15 јавни обвинители.
Вчера беше одбележана годишнина од трагедијата која ја зави Македонија во црно. Со поставувањето на симболичната инсталација „63 бели столчиња – 63 животи“, во Паркот на револуцијата во Кочани се одбележа годишнината од трагичниот пожар.
„63 бели столчиња, 63 имиња, 63 животи што недостигаат – секое столче ја носи тишината на едно отсутно присуство, бела роза за спомен, светлина за сеќавање и место што никогаш нема да биде исполнето“, беше пораката што ги пречека присутните, меѓу кои делегации, семејства на загинатите и останати граѓани пред Домот на културата во Кочани.