Претседателот на Украина, Володимир Зеленски, соопшти дека Русија во текот на ноќта извршила масовен напад врз земјата, при што биле истрелани над 600 дронови и повеќе од 30 проектили.
Во нападите загинаа најмалку три лица, меѓу кои и четиригодишно дете, а осуммина се повредени. Зеленски истакна дека руските напади биле насочени кон енергетскиот систем, цивилната инфраструктура и „во суштина целата инфраструктура на секојдневниот живот“.
„Нападите непосредно пред Божик, кога луѓето сакаат да бидат со своите семејства во домот и на безбедно, испраќаат директна и јасна порака за руските приоритети. Путин и понатаму не разбира дека мора да престане со убивањето. А тоа значи дека светот не врши доволен притисок врз Русија“, порача Зеленски.
Претседателот на Украина побара од западните сојузници поригорозни санкции за Русија и зголемување на помошта за Киев.