Градоначалникот на Скопје, Орце Ѓорѓиевски, најави 60 дополнителни приватни автобуси кои ќе бидат ставени во функција за да се решат проблемите со нефункционалните линии и гужвите во јавниот превоз.
Ова е дел од новиот пакет мерки за подобрување на транспортот во главниот град. Ѓорѓиевски најави и дека БРТ системот ќе биде вклучен во ребалансот на буџетот.
„Имаме средба со приватните превозници по овој настан. Како што најавив, ќе бидат ставени во функција 60 приватни автобуси дополнително кои ќе го олеснат транспортот на нашите сограѓани. Во ребалансот ќе влезе и БРТ системот,“ изјави Ѓорѓиевски.
Тој нагласи дека за решавање на сообраќајниот хаос мора да се понуди комбинација од различни транспортни решенија.
„За многу скоро време, нашите сограѓани ќе добијат ефикасен и ефективен јавен транспорт каков што заслужуваат,“ додаде градоначалникот, потенцирајќи дека модернизацијата на системот е главен приоритет на новата градска администрација.