Одбележувањето на 25-годишнината од потпишувањето на Охридскиот рамковен договор започнува денеска со серија панел-дискусии, а главниот настан е предвиден за утре на Камениот мост во Скопје.
Под покровителство на Министерството за односи меѓу заедниците и министерот Агон Ферати, денеска во Клубот на пратеници ќе се одржат три панел-дискусии посветени на досегашната примена на Договорот, меѓуетничките односи и неговата улога во идниот развој на земјата.
Првата дискусија ќе биде посветена на Охридскиот рамковен договор и патот кон европската интеграција. Ќе се разговара за неговото спроведување, наследството, соживотот и инклузијата на заедниците, како и за современите предизвици и европската перспектива на Македонија.
На вториот панел, под наслов „Иднината на Охридскиот договор и градењето одржлив мир“, ќе се разгледува неговото значење за стабилноста, меѓуетничкиот соживот и демократскиот развој, со посебен акцент на идните предизвици и улогата на институциите.
Третата панел-дискусија ќе се фокусира на децентрализацијата и локалниот развој како основа за јакнење на демократијата и социјалната кохезија. Ќе се разговара и за поголемото учество на граѓаните, функционалноста на локалните институции и еднаквите можности за развој.
Главниот настан по повод 25-годишнината ќе се одржи утре од 19:30 часот на Камениот мост во Скопје.