Директорот на Бирото за јавна безбедност, Александар Јанев денес и утре присуствува на регионална конференција на ИНТЕРПОЛ која се одржува во Глобалниот комплекс на иновации на ИНТЕРПОЛ во Сингапур.
Директорот Јанев оствари повеќе билатерални средби со високи претставници од азиските држави како и со раководството на Генералниот секретаријат и Извршниот комитет на ИНТЕРПОЛ.
„Со соговорниците разговаравме за унапредување на полициската соработка преку иновативни пристапи, кои се особено значајни во време на забрзани технолошки промени и сè покомплексни безбедносни предизвици. Како потврда на нашите заложби за современо и ефикасно полициско делување, истакнав потреба од нови модели на размена на информации, користење на современи технолошки алатки и целосна дигитална трансформација на полициските процеси со кои ќе можеме да изградиме поцврста и поефективна соработка – не само на национално и регионално, туку и на меѓународно ниво.“, потенцираше директорот Јанев.
Конференцијата се фокусира на клучните приоритети за глобалната безбедност, како што се борбата против организираниот криминал, справувањето со тероризмот, зајакнувањето на капацитетите за справување со сајбер-криминал и лоцирањето бегалци од правдата.
„Македонската полиција уште еднаш беше препознаена како доверлив и активен партнер, со јасна определба да придонесува кон глобалната безбедност преку размена на информации, искуства и учество во заеднички меѓународни операции. Нашата посветеност е јасна: да бидеме сигурен и одговорен сојузник во градењето на побезбеден свет.“, истакна од конференцијата директорот Јанев.