На итна седница на Советот за безбедност на Обединетите нации, Кина и Русија остро го осудија американското воено дејствување во Венецуела, додека Соединетите Американски Држави го бранеа своето постапување како легална операција за спроведување на законот. Дебатата ги разоткри длабоките поделби меѓу светските сили по апсењето на венецуелскиот претседател Николас Мадуро и неговата сопруга Силија Флорес.
Кина: САД не може да биде светски полицаец
Кинескиот претставник во ОН, Фу Конг, ги обвини САД за грубо кршење на меѓународното право и принципите на суверенитет.
„Како постојан член на Советот, САД ги игнорира сериозните загрижености на меѓународната заедница, безобѕирно го прекрши суверенитетот, безбедноста и легитимните права и интереси на Венецуела, сериозно кршејќи ги принципите на суверена еднаквост“, изјави Фу.
Тој нагласи дека ниту една држава нема право да се наметнува како глобален авторитет.
„Ниту една земја не може да се однесува како светски полицаец, ниту пак некоја држава може да се смета за меѓународен судија.“
Кина јасно побара од САД веднаш да го ослободи Мадуро и неговата сопруга.
Русија: Враќање во ера на беззаконие и доминација со сила
Рускиот амбасадор во ОН, Василиј Небензја, изјави дека американската интервенција ги шокирала сите кои очекувале поинаков пристап од администрацијата на Доналд Трамп, фокусиран на дипломатија и компромис.
„Нападот на лидерот на Венецуела е знак на враќање во ера на беззаконие и доминација на САД со сила, хаос и беззаконие“, рече Небензја.
Тој додаде дека за американските „злосторства“ нема оправдување и повторно побара ослободување на уапсениот венецуелски пар. Москва, како што посочи, претходно позитивно ја оценувала надворешната политика на Трамп, особено поради неговиот став кон војната во Украина, наведувајќи дека „во голема мера се совпаѓа со нашата визија“.
САД: Ова не е војна, туку спроведување на законот
Американскиот амбасадор во ОН, Мајк Волтс, ги отфрли обвинувањата, истакнувајќи дека не станува збор за воена интервенција.
„Во Венецуела нема војна. Ние не ја окупираме земјата. Ова беше операција за спроведување на законот во врска со легални обвиненија кои постојат со децении“, изјави Волтс.
Тој направи споредба со апсењето на поранешниот панамски лидер Мануел Нориега во 1989 година, наведувајќи го како преседан за ваков тип дејствување.
Волтс најави дека „необорливите докази“ за злосторствата на Мадуро, кои вклучуваат обвиненија за нарко-тероризам, увоз на кокаин и трговија со оружје, ќе бидат „јавно претставени во судските постапки на САД“.
„Мадуро не е само обвинет трговец на дрога. Тој беше нелегитимен таканаречен претседател. Сакам да потврдам дека претседателот Трамп му даде шанса на дипломатијата. Му понуди повеќе опции, обидувајќи се да деескалира, но Мадуро ги одби“, заклучи Волтс.