Маж со иницијали Ж. Н. (69) вчера во близина на Белград со скалпел ѝ го пресекол грлото на својата снаа И. Н. (70) на сред улица, пренесува српски „Телеграф“. По повредувањето, жената успеала облеана во крв да дотрча до локалната амбуланта каде лекарите со брза интервенција успеале да ѝ го спасат животот.
Нападот се случил по кратка и жестока вербална расправија меѓу напаѓачот и жртвата, која е сопруга на неговиот покоен брат. Според информациите, тие двајца со години имале нарушени семејни односи и нерешени сметки.
Откако добила длабок рез на вратот, И. Н. водена од инстинкт за преживување успеала да побегне во блиската здравствена установа. Медицинскиот тим реагирал веднаш, го санирал длабокиот рез и констатирал дека сечилото ги промашило главните артерии, со што нејзиниот живот е надвор од опасност.
Полицијата брзо го лоцирала и го уапсила шеесет и деветгодишниот маж, кој во станицата во целост го признал делото и го открил мотивот за нападот.
„Имаме лоша врска со години, таа ме навредуваше и претходно на улица“, се бранеше Ж. Н. пред инспекторите, а потоа изговори реченица што сведочи за целосно ментално затемнување: „Но вчера ми рече дека наскоро ќе умрам. Тоа целосно ме излуди и ме разбесни.“
Осомничениот се наоѓа во притвор, а истрагата за сите околности на ова тешко семејно насилство е во тек.