Нафтен терминал во Санкт Петербург, кој се наоѓа во рускиот регион Ленинград, бил нападнат во раните утрински часови на 3 јуни. Очевидци тврдат дека имало силни експлозии и голем пожар кој избувнал во еден од најважните енергетски капацитети во Русија, пишува Киев Индипендент.
Нападот се случи на самиот ден на почетокот на Меѓународниот економски форум во Санкт Петербург, традиционален собир на политички и бизнис елити што секоја година го организира рускиот претседател Владимир Путин.
Во текот на утрото жителите на Санкт Петербург објавија фотографии и видеа од силни детонации и голем пожар предизвикан, како што велат, од напад на украински дрон. На снимката се гледа густ црн чад кој се издигнува над терминалот за нафта. Анализата на рускиот независен Телеграмски канал Астра исто така заклучи дека беспилотните летала го погодиле нафтениот терминал во Санкт Петербург и го предизвикале пожарот.
Овој објект е еден од најголемите руски магацини и извозни терминали за нафтени деривати. Се наоѓа на брегот на Финскиот залив, во рамките на Големото пристаниште во Санкт Петербург, а низ него годишно поминуваат околу 12,5 миллиони тони нафтени продукти кои се транспортираат со речен, железнички и патен транспорт.
Одбранбените служби на Руската Федерација излегоа со куси информации за утринските дејствија на противвоздушната одбрана. Гувернерот на Ленинградската област Александар Дрозденко објави дека во текот на ноќта над регионот биле соборени 50 дронови, но не ги коментираше пожарите кои избувнаа во пристаништето. Во моментот на објавување на извештајот, не беше можно самостојно да се потврдат сите наводи, а се уште не е познат обемот на штетата.
Украина претходно во неколку наврати ги нападна пристаништето и енергетската инфраструктура во Ленинградската област. Во јануари 2024 година, украинско беспилотно летало наводно било соборено над истиот нафтен терминал, по што избувнал пожар. Во септември 2025 година, украинските сили го нападнаа Приморск, најголемото руско нафтено пристаниште на Балтичкото Море, принудувајќи го објектот привремено да ја прекине работата.
Новиот напад се случи само еден ден откако Русија изврши разурнувачки масовен напад со проектили и беспилотни летала врз Киев, Днипро и други украински градови. Најмалку 23 лица загинаа во тие напади, меѓу кои и две деца, додека повеќе од сто лица беа повредени. Нападот уследи по неколкудневните предупредувања на украинските власти дека Москва подготвува нов голем воздушен напад.
Инаку, нападот на Санкт Петербург беше извршен токму на денот кога Путин требаше да го отвори својот петти воен Меѓународен економски форум во тој град – настан кој често се нарекува „руски Давос“, каде претставници на повеќе од 130 земји и територии се собираат во текот на три дена. На форумот треба да се појави и член на администрацијата на американскиот претседател Доналд Трамп, што би било прво познато појавување на американски функционер на настанот по неколку години.
Руското раководство со години го користи овој економски настан за испраќање пораки до меѓународната заедница во однос на економските капацитети на земјата. Путин со години го користи форумот за да ја демонстрира издржливоста на руската економија и да испрати порака дека Русија, и покрај санкциите од Западот и меѓународната изолација по инвазијата на Украина, останува отворена за бизнис. На минатогодишниот форум Путин тврдеше дека „цела Украина и припаѓа на Русија“.