Украинскиот претседател Володимир Зеленски во своето редовно вечерно обраќање објави податоци за кои тврди дека ги претставуваат руските загуби во човечки ресурси во текот на изминатиот месец.
Според неговите тврдења, воените единици на Украина во јули неутрализирале повеќе од 30.000 противнички војници.
Вкупно, во јули, сите наши единици на фронтот елиминираа 30.272 Руси – особено користејќи беспилотни летала. Оваа бројка ги вклучува и мртвите и тешко ранетите. И оваа бројка ги вклучува само случаите за кои има јасни видео докази – изјави Зеленски.
Тој посочи дека ваквите податоци покажуваат оти состојбата на теренот ја задржува истата динамика.
Секој месец, Русите губат околу 30.000 војници. Нашата армија и сите единици на украинските одбранбени и безбедносни сили ќе имаат уште повеќе беспилотни летала. Им благодарам на сите што ја бранат Украина и нашиот народ, и на сите што ни помагаат со ракети за воздушна одбрана! Воздушната одбрана е врвен приоритет. Важно е нашите партнери да ја слушнат Украина и да знаат дека секој пакет за нашата воздушна одбрана навистина штити животи – заклучи украинскиот претседател.
Паралелно со оваа изјава, Русија изврши масовен напад со балистички ракети и беспилотни летала врз Украина. Во нападот врз главниот град и Киевскиот регион загинаа најмалку 15 лица, а 51 беа ранети.
Нападите следуваат по изјавата на американскиот амбасадор во НАТО, Метју Витакер, кој истакна дека долгорочниот договор за лиценцирано производство на ракети-пресретнувачи „Патриот“ во Украина нема да биде подготвен до претстојната зима.
Инаку, системот „Патриот“ е еден од ретките одбранбени системи во светот со можност за соборување на балистички ракети.