По завршувањето на локалните избори, граѓанската иницијатива Зелен Хуман Град ги оцени резултатите како јасен знак дека граѓаните се разочарани од актуелните политичари.
„Граѓаните ни порачаа дека корупцијата, празните ветувања и националистичките наративи повеќе не се прифатливи,“ велат од иницијативата. „Овие резултати не се апатија – тие се ПРОТЕСТ.“
Зелен Хуман Град посочува дека во првиот круг на изборите излезноста паднала под 50%, а во четири општини не бил достигнат цензусот, па гласањето за градоначалник ќе се повтори. Рекордни речиси 54.000 гласа беа неважечки за градоначалници и над 50.000 за членови на советите. Во вториот круг излезноста беше уште пониска – само 40%, а во Скопје едвај 35% од граѓаните гласале за градоначалник.
„Многу граѓани се разочарани од постоечките политички опции и сметаат дека не постои политичка сила која го заслужува нивниот глас,“ изјавуваат од Зелен Хуман Град. „Но, вистинската промена не доаѓа од оние што го создале системот, туку од луѓето кои имаат храброст да се спротивстават.“
Иницијативата ги повикува сите незадоволни граѓани да им се придружат: „Дајте го својот потпис за да формираме партија со која заеднички ќе се бориме за похумано и позелено општество. Политиката може да биде чесна и посветена на јавниот интерес – но само ако ја водат луѓе кои тоа веќе го покажале со своето волонтерство и труд за општото добро.“