Заврши ерата на Меркел, познат е составот на идната германска влада

По два месеци преговори, партиите на идната германска влада, Социјалдемократската партија на Германија (СПД), Зелените и Либерално-демократската партија (ФДП) денеска во Берлин го претставија својот коалициски договор.

„Мојата најважна порака денес е: Таблата со резултати е тука. СПД, Зелените и ФДП постигнаа договор за коалиција“, рече кандидатот на СПД за канцелар Олаф Шолц.

„Нас нè поврзува желбата да ја однесеме земјата напред“, рече Шолц, најавувајќи договор за формирање трипартитна владејачка коалиција.

Како еден од најважните проекти, Шолц најави вложување дополнителни напори со цел да се постигнат климатските цели.

Формирањето на коалицијата допрва треба да биде потврдено од партиите на нивните конвенции или преку испитување за членство, а Олаф Шолц треба да биде избран за нов канцелар во Бундестагот во првата недела од декември.