Државниот пазарен инспекторат (ДПИ) најави интензивирање на инспекциските контроли на пазарот на ѓубрива. Акцијата се спроведува во согласност со владините одлуки за ублажување на економските последици и заштита на домашното земјоделско производство, при што инспекторите ќе вршат строг надзор врз почитувањето на пропишаните цени и залихи.
„ДПИ ќе постапува по сите утврдени неправилности и ќе изрекува соодветни мерки и санкции согласно со законските надлежности. Апелираме до сите економски оператори во големопродажба и малопродажба да постапуваат во согласност со донесените одлуки, со цел обезбедување фер пазарни услови и заштита на интересите на земјоделците и граѓаните. Државниот пазарен инспекторат останува посветен на доследна примена на законите и заштита на економската стабилност“, соопштија од ДПИ.
Контролите ќе се фокусираат на примената на новите ценовни лимити. Кај неорганските ѓубрива, највисоката цена се утврдува врз основа на цените што се применувале на 15 април 2026 година, намалени за 10 проценти.
Дополнително, се ограничува бруто-профитната маржа во трговијата на големо и мало. За неорганските ѓубрива таа смее да изнесува до 5 проценти, додека за органските ѓубрива, органо-минералните ѓубрива, биостимулаторите и подобрувачите на својствата на почвата, маржата е ограничена до 10 проценти.
Инспекторатот потсетува дека сите трговци се должни да обезбедат континуирано снабдување на пазарот. Овие владини одлуки ќе се применуваат заклучно со 31 мај 2026 година.