Градоначалникот на Град Скопје, Орце Ѓорѓиевски, преку емотивна објава на социјалните мрежи се прости од легендарниот македонски актер Гоце Тодоровски.
Ѓорѓиевски истакна дека не постојат вистински зборови за простување од човек кој зад себе оставил убавина, спомени и човечка топлина, нагласувајќи го големиот придонес на актерот за македонската култура.
„Имавме многу заеднички моменти, разговори, средби и спомени кои денес добиваат уште поголема вредност. Спомени што ќе ги носам со себе и кои времето никогаш нема да ги избрише. Гоце Тодоровски беше дел од нашето детство, од нашите домови, од нашите животи. Со неговите улоги растевме ние, растеа нашите родители, а ќе растат и генерациите што доаѓаат по нас“, напиша Ѓорѓиевски.
Тој додаде дека Тодоровски целиот свој живот ѝ го посветил на уметноста, оставајќи зад себе непроценливо богатство, а секоја негова емоција и збор остануваат како траен печат.
„Денес замина човекот, но легендата останува. Чичко Гоце, ти благодарам за сѐ! Ти благодарам за добрината, за насмевката, за човечноста и за сите моменти што имав чест да ги споделам со тебе. Ти благодарам за неповторливиот придонес во македонската уметност и за неизбришливата трага што ја остави во срцата на сите нас“, се наведува во објавата.
Ѓорѓиевски во својата Poraka истакна дека луѓето како Тодоровски никогаш вистински не заминуваат, бидејќи продолжуваат да живеат преку своите дела и сеќавањата на оние што ги сакале.
„Нека ти е светол патот кон вечноста“, порача Ѓорѓиевски.