Србија за една година ќе започне со сериско производство на балистички ракети со долг дострел, најави српскиот претседател Александар Вучиќ за време на Бизнис саемот Србија-Узбекистан, пренесуваат регионалните медиуми.
Вучиќ истакна дека земјата е подготвена самостојно да го започне овој проект, но упати покана и до Узбекистан за можна соработка во развојот на воената технологија.
„Можеме да постигнеме одлични резултати во одбранбената индустрија. Напредуваме во тој сектор, учиме, преземаме технологија од една сила и ја пренесуваме на други“, рече Вучиќ.
За време на своето обраќање, тој директно му се обрати на Ненад Милорадовиќ, помошник-министер за одбрана за материјални ресурси, прашувајќи го за временската рамка потребна за почеток на производството. По потврдата од Милорадовиќ дека веќе се произведуваат ракети со краток дострел и дека за оние со долг дострел ќе биде потребна една година, Вучиќ ја образложи стратегијата.
„За една година ќе започнеме со производство на балистички ракети со долг дострел и сме подготвени да соработуваме со вас и по ова прашање. Ова е вест за која ретко зборуваме со граѓаните на Србија, но таа сведочи за нашиот технолошки, индустриски и суштински напредок“, рече Вучиќ.
Српскиот претседател повтори дека домашните стручњаци веќе имаат постигнато значаен напредок на овој план.
„Нашите експерти веќе направија многу и верувам дека, како што реков, ќе го постигнеме тоа за една година. Подготвени сме да соработуваме со нашите пријатели од Узбекистан во оваа област“, додаде тој.