Најмногу дожд во изминатите 24 часа до 8 часот утрово е измерен во Штип, каде што наврнале 18 литри на квадратен метар, информира Управата за хидрометеоролошки работи (УХМР).
Според податоците од дождомерните станици на УХМР, во Куманово се измерени 14 литри на квадратен метар, во Скопје-Петровец 11, во Струмица 10, а во Скопје-Зајчев Рид осум литри.
Во Берово се регистрирани седум литри на квадратен метар, додека во Крива Паланка, Прилеп, Виница, Крушево и Попова Шапка се измерени по четири литри. По три литри дожд наврнале во Претор, Битола, Демир Капија, Кавадарци и Тополчани, а во Гевгелија и Пожаране се измерени по два литри на квадратен метар.
Од УХМР нагласуваат дека поради локалниот карактер на атмосферските процеси, количината на врнежи може значително да се разликува од место до место, а на одделни локации може да биде и значително поголема од измерената.
За денеска се очекува променливо облачно време со сончеви периоди и повремени врнежи од дожд. Локално ќе има нестабилност со пороен дожд, грмежи и засилен ветер, а во одделни делови од земјата се можни и краткотрајни невремиња со град.
Ќе дува умерен до засилен ветер од северен правец, кој долж Повардарието повремено ќе достигнува и над 60 километри на час. Максималната температура ќе се движи од 26 до 33 степени.
Во Скопје ќе преовладува променливо облачно време со сончеви периоди и умерен, повремено засилен северен ветер. Во делови од скопската котлина се очекуваат повремени врнежи и локална нестабилност со пороен дожд, грмежи и ветер. Максималната температура ќе достигне до 29 степени.