Лицето со иницијали Д. Ц., вработено како возач во Службата за општи и заеднички работи на Владата, е уапсено за примање поткуп во акција која потекнува од иницијатива на институциите на кои им било пријавено барањето за незаконска награда.
Возачот бил затекнат на 4 септември 2026 година при примопредавање на 500 евра, како дел од вкупно побараните 1.500 евра. Од Владата нагласуваат дека парите претходно биле обележани.
„Истото лице во моментот на незаконското делување работело и остварувало задачи како возач за потребите на Генералниот секретаријат на Владата, откако претходно засновало работен однос по примерот на сите останати институции во Службата за општи и заеднички работи на Владата“, се вели во соопштението од Илинденска бр. 2.
Од Владата потенцираат дека целата акција е дел од заложбите за бескомпромисна борба против корупцијата.
„Со овој случај се покажува дека законите важат за сите, се докажува волјата и целта на Владата да се бори против корупцијата. Со ова се подвлекува јасна граница помеѓу оние кои сакаат злоупотреби и сите други кои се борат против нив. Ова е уште еден пример како преку заедничка соработка на органите и институциите може да се спроведе правда“, велат од Владата.
Претходно, Министерството за внатрешни работи информираше дека Д.Ц. е лишен од слобода по поднесена пријава од граѓанин.
Основното јавно обвинителство за гонење на организиран криминал и корупција отвори истражна постапка против вработениот за кривично дело „Примање награда за противзаконито влијание“.
На предлог на јавниот обвинител, а поради опасност од бегство, влијание врз сведоци и повторување на делото, судија на претходна постапка му одреди на осомничениот притвор во траење од 30 дена.