Авион на „Туркиш ерлајнс“ денеска доживеа инцидент при слетување на меѓународниот аеродром Трибхуван во Катманду, Непал, кога на пистата избувна пожар.
Според првичните информации, летот кој пристигнал од Истанбул безбедно слетал, но кратко потоа од десната страна на пистата бил забележан оган и густ чад.
Во авионот тип Ербас А330 се наоѓале 277 патници и 11 членови на екипажот, кои веднаш биле евакуирани. Надлежните служби реагирале брзо и успеале да го стават пожарот под контрола.
Од аеродромските власти е потврдено дека во инцидентот нема повредени, но аеродромот привремено бил затворен додека траела интервенцијата и расчистувањето на пистата. Поради тоа, дел од летовите кон Катманду биле пренасочени или задржани.
Според првичните информации од Управата за цивилно воздухопловство на Непал, се сомнева дека искра на пистата можела да го предизвика пожарот, но истрагата сè уште е во тек.
Непалските власти потсетуваат дека аеродромот Трибхуван е подложен на чести предизвици при слетувања поради планинскиот терен и временските услови, што понекогаш доведува до слични инциденти.