Синоќешниот земјотрес со јачина од 4,8 степени според Рихтеровата скала предизвика вознемиреност кај граѓаните во Македонија и соседството. На социјалните мрежи веќе се шират видеа на кои се гледа како жителите на станбени згради во Феризај во паника ги напуштаат своите домови.
Потресот бил силно почувствуван и во Скопско каде граѓаните пријавуваат тресење на лустери и предмети во домовите, а слични сцени доаѓаат и од јужна Србија. Жителите на Ниш сведочат дека потресот траел релативно долго.
Една жителка на Ниш за „Телеграф“ го опишува моментот на потресот:
„Гледав телевизија и почувствував тресење, прво помислив дека е хипертензија, потоа ги погледнав собните растенија и видов како се тресат лисјата. Се тресеше околу десет секунди.“
Покрај вознемиреноста, пријавена е и материјална штета во продавница во Косово. На страницата на EMSC корисници од Призрен коментираат дека потресот бил „краток, но силен“.
Земјотресот, освен во Македонија и Србија, беше почувствуван и во Албанија, Бугарија, Црна Гора, Грција и Босна и Херцеговина.