Пратеникот од редовите на ВМРО-ДПМНЕ, Миле Лефков, денеска на прес-конференција изнесе детали околу приведувањето на поранешниот директор на Царината и екс-градоначалник на Карпош, Стефан Богоев.
Според партиските информации, сомневањата се поврзани со доделување договори за јавни набавки за одржување хигиена на граничните премини во периодот додека тој раководел со институцијата.
„Поранешниот потпретседател на СДС и поранешен директор на Царина, како и поранешен градоначалник на Карпош, Стефан Богоев е уапсен поради сомнение за местење на тендери за надворешно одржување хигиена на гранични премини и терминали. На сајтот на јавни набавки се гледаат неколку тендери за оваа намена на кои потпис ставил Богоев. Повеќето ги добиле јавни претпријатија, а два тендери кои ги добила битолска фирма се со највисока вредност и во износ од околу 350 илјади евра“, изјави Лефков.
Од владејачката партија посочуваат дека во целиот случај е инволвирано уште едно поранешно партиско лице од Прилеп, за кое тврдат дека веќе било предмет на претходни истраги.
„Поранешниот претседател на СДММ и дете израснато од Зоран Заев кој во дадени моменти се заговараше и дека треба да го наследи, според обвиненијата наместил тендери заедно со уште едно лице Александар Спирковски викан Џемо од Прилеп, инаку поранешен претседател на ОО на СДС. Џемо инаку е лице кое во Прилеп плаќаше луѓе за да гласаат за СДС, лице кое тепа сограѓани сред бел ден и за тоа не одговара. Претходно тој беше и приведен како дел од аферата со прилепската болница кога Основното јавно обвинителство отвори истрага за финансиското работење во болницата“, додаде пратеникот.
Лефков ја заврши прес-конференцијата со порака дека за ваквите случаи мора да следи соодветна законска разрешница.
„Ова е вистинското лице на СДС. Афери, тендери, рекети и криминал. Одговорност за криминалите на СДС мора да има!“, заклучи Лефков.