Опозицискиот СДСМ денеска јавно обвини за наводна нова координирана шема за преземање и финансирање на Алфа ТВ. Како што изјави портпаролката и членка на Извршниот одбор на партијата, Богданка Кузеска, информациите до нив стигнале од свиркачи, а целиот процес наводно го координира вицепремиерот Александар Николоски по директна насока на премиерот Христијан Мицкоски.
Според партијата, промените во Унгарија ја загрозуваат досегашната медиумска структура во регионот, по што се бара начин за пренасочување на фондовите во земјава преку конкретни финансиски институции.
Опозицијата тврди дека планот предвидува вклучување на нови компании кои треба да го преземат сопственичкиот удел и техничките капацитети на медиумот, со цел да се заобиколат сегашните блокади.
„Во Македонија, планот е преку нови фирми регистрирани кај нас да се преземат концесијата, опремата и студијата на Алфа ТВ, а целиот финансиски механизам да оди преку Алта банка. Алфа Скоп, фирмата сопственик на Алфа ТВ е блокирана сметка, должи 100.000 евра и веќе е пред стечај“, изјави Кузеска.
Дополнително, од СДСМ посочуваат дека во тек е и позиционирање на кадровски решенија во регионалните медиумски претставништва кои треба да бидат дел од оваа операција.
„Нашите инфромации говорат дека Ивона Талевска од пред неколку денови е назначена за координатор на Еуроњуз за Македонија преку преставиштвото на Еуроњуз во Србија. Тоа е првиот дел“, се наведува во партиското соопштение.
Кузеска додаде дека стратегијата вклучува и формирање на посебна маркетинг агенција која преку ПР активности за банката би обезбедувала средства за медиумска поддршка на владејачката партија.
Од СДСМ потсетуваат дека веќе имаат поднесено соодветни правни пријави за претходното работење на медиумот и побараа итна реакција од истражните органи за најновите сознанија.