Портпаролката на СДСМ, Богданка Кузеска, денеска на прес-конференција побара од Владата предводена од Христијан Мицкоски да одговори дали во текот на неодамнешната посета на Велика Британија биле водени разговори за прифаќање мигранти и отворање мигрантски кампови во Македонија.
Според Кузеска, македонската владина делегација која неколку дена престојувала во Британија избегнува да даде јасни информации за содржината на средбите, иако, како што вели, „реномирани британски медиуми објавија дека токму прашањето за мигрантите било во фокусот на разговорите со британските претставници“.
„Ова е јасен знак дека повторно на оваа тема нешто се крие. Мицкоски одбил да разговара за ова прашање со медиумот Тајмс и за македонската телевизија дал само штур одговор,“ изјави Кузеска.
Таа посочи дека според информации од Лондон, Велика Британија нуди стратешки инвестиции за земјите од регионот, но дека тие доаѓаат во пакет со разговори за отворање кампови за мигранти.
„Бидејќи владата веќе најави кредит од 7 милијарди евра од Британија, Мицкоски мора јавно да каже што точно е договорено и дали постои дополнителен договор поврзан со мигрантите,“ рече Кузеска, прашувајќи:
- Што точно се разговарало на темата мигранти и кампови за мигранти?
- Дали со договорот за заем постои и друг договор што јавноста не го знае?
- Зошто Мицкоски одбил интервју за Тајмс ако, како што тврди, нема што да крие?
СДСМ побара Владата веднаш да ја информира јавноста и да соопшти дали Македонија се обврзала на какви било услови поврзани со прифаќање мигранти.