ВИДЕО: Хезболах ја погоди викендичката на Бенјамин Нетанјаху

Викендичката на плажа на израелскиот лидер Бенјамин Нетанјаху е оштетена во напад со беспилотно летало, според видеата што се појавија на социјалните мрежи. Хезболах ја презеде одговорноста за овој напад длабоко во израелска територија.

Нетанјаху и неговата сопруга не биле во објектот за време на нападот во крајбрежниот град Цезареја и никој не е повреден, соопштија израелските власти, пренесе Си-ен-ен.

Но инцидентот покрена прашања за тоа како дронот ја избегнал израелската противвоздушна одбрана во време кога раководството на Хезболах е десеткувано, а израелската војска ги засилува нападите низ делови на Либан.Израелската војска во саботата соопшти дека „идентификувани се три беспилотни летала што преминаа од Либан на израелска територија. Две од леталата беа пресретнати. Еден дополнителен дрон удри во структура во областа на Цезареја“.

Портпаролот на израелскиот премиер тој ден го потврди нападот, но дури во вторникот израелските власти признаа дека дронот ја погодил куќата.

Хезболах во вторникот презеде „целосна и ексклузивна одговорност“ за нападот и издаде предупредување: „Ако сè уште не сме стигнале до вас, знајте дека меѓу нас и вас се деновите, ноќите и бојното поле“.

Во објавата на Икс по нападот во саботата, Нетанјаху ги обвини „агентите на Иран“ за нападот и рече дека „направиле голема грешка“.

„Им велам на Иранците и нивните партнери во оската на злото: Секој што ќе им наштети на граѓаните на државата Израел ќе плати висока цена“, додаде Нетанјаху.

Иран негираше вмешаност во нападот со беспилотно летало, наведувајќи дека операцијата е „изведена од Хезболах“.