Под мотото „Македонија забрзува, наша обврска“, ВМРО-ДПМНЕ денеска го одбележува 36-годишнината од своето формирање. По тој повод, на стадионот „Младост“ во Струмица ќе се одржи голем народен собир.
Настанот е закажан за 20:00 часот, а од партијата упатуваат покана до сите членови, симпатизери и поддржувачи, како и до граѓаните кои ја поддржуваат идејата за напредок, работа и патриотизам, да присуствуваат и заеднички да го одбележат јубилејот.
Како што наведуваат од ВМРО-ДПМНЕ, собирот има за цел да покаже единство, енергија и верба во иднината на државата.
-Пред 36 години беше создадена идеја која стана симбол на борбата за слободна, независна и достоинствена Македонија – идеја која ги обедини сите оние кои веруваа дека оваа држава има право на сопствен пат, на сопствен глас и на сопствена иднина. Денес, 36 години подоцна, го одбележуваме патот што заедно го изодевме, сите предизвици што ги надминавме и сите победи кои ги остваривме како народ. Во овие 36 години имавме и тешки моменти и големи искушенија. Имаше периоди кога требаше да се брани државата, кога требаше да се зачуваат националните интереси и кога требаше да се покаже карактер и истрајност. Државата кога беше одземена и требаше да стане повторно ваша. Секогаш кога било најтешко, силата доаѓала од народот. Од граѓаните кои верувале во Македонија и кои никогаш не се откажале од неа, вели претседателот на ВМРО-ДПМНЕ и премиер, Христијан Мицкоски.
Генералниот секретар на ВМРО-ДПМНЕ, Драган Ковачки, на прес-конференција рече дека изминатите 36 години беа проткаени со единствена идеја – независна и силна Македонија, Македонија која чекори достоинствено.
-Ова е ден кога ја одбележуваме историјата која не обврзува и иднината која доаѓа. Точно пред 36 години се создаде идеја која беше, која е, и која ќе биде водилка која не обединува сите нас, сите кои сме за Македонија која има сопствен пат и сопствена иднина. Во среда, 36 години подоцна, ќе го одбележиме патот кој го минувавме заедно и ќе се потсетиме на сите предизвици на тој пат. Факт е дека оттогаш до денес за Македонија и за граѓаните патот не беше лесен. Но, патот беше проткаен со единствена идеја – независна и силна Македонија, Македонија која чекори достоинствено, истакна Ковачки.