Возачите кои претстојниот викенд планираат да патуваат кон Халкидики ќе се соочат со привремен променет сообраќаен режим. Причина за ова се градежните работи кои се изведуваат на обиколницата околу Солун.
Според официјалните најави, сообраќајните измени започнуваат уште вечерва, 10 јуни, во периодот од 23 часот до 5 часот наутро, кога дел од обиколницата во правец кон Халкидики ќе биде целосно затворен за сообраќај.
Клучниот прекин е предвиден за претстојниот викенд. Од петок, 12 јуни во 23 часот, па сè до недела, 14 јуни до 23 часот, истиот дел од патот ќе биде затворен во двата правци.
Поради овие градежни активности се очекуваат големи гужви и значително забавување на сообраќајот низ Солун, а возилата ќе се пренасочуваат по алтернативни правци.
Овие активности се дел од големиот инфраструктурен проект „Fly over“, наменет за реконструкција на сообраќајната мрежа околу Солун. Проектот започна во 2023 година, а неговото завршување е планирано за следната пролет.