Соединетите Американски Држави подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.
Според истите извори, меѓу мерките што се разгледуваат е таргетирање на бродовите од руската флота на нафтени танкери, како и санкционирање на трговци и посредници кои учествуваат во олеснување на трансакциите поврзани со извозот на руска нафта.
Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.
Според најавите, новите санкции би можеле да бидат објавени уште во текот на оваа недела, доколку не дојде до напредок во мировните разговори.