Украинскиот парламент не успеа да го именува Михаило Федоров за нов министер за одбрана, откако неговата кандидатура не доби доволна поддршка од пратениците, јави германската новинска агенција ДПА. Федоров, кој има 34 години, досега ја предводеше Министерството за дигитализација, формирано во 2019 година.
Кандидатурата на Федоров беше предложена од претседателот Володимир Зеленски и, согласно уставот, мора да биде потврдена од парламентот. Доколку беше избран, тој ќе станеше четврти министер за одбрана од почетокот на руската инвазија врз Украина во февруари 2022 година. Ново гласање се очекува утре.
Во меѓувреме, не беше потврдена ниту кандидатурата на поранешниот министер за одбрана Денис Шмихал за министер за енергетика. Во услови на масовни прекини на струја и греење низ земјата, на Шмихал му недостасуваа 16 гласа за да ја добие функцијата.
Шмихал претходно беше разрешен од позицијата министер за одбрана, на која помина помалку од шест месеци. Пред тоа, 50-годишниот политичар, кој важи за близок соработник на Зеленски, беше премиер на Украина повеќе од пет години.
Парламентот, исто така, се согласи да го разреши шефот на украинската безбедносна служба СБУ, Васил Малјук. Тој де факто ја водеше агенцијата од 2022 година, период во кој СБУ спроведе повеќе напади врз руски воени цели.
Смената на Малјук наиде на отпор од дел од високите воени структури, а парламентарната комисија за одбрана ја даде својата согласност дури при вториот обид.
Украина речиси четири години се брани од руската инвазија со поддршка од западните сојузници, додека обвинувањата за корупција поттикнаа пошироки обиди за реконструкција на владата.