Управата за хидрометеоролошки работи (УХМР) ги објави официјалните податоци за максималната брзина на ветерот измерена за време на силното невреме на 21 јули 2026 година.
Според автоматските метеоролошки станици, во повеќе региони низ државата биле регистрирани екстремни оркански удари на ветерот.
Најсилна брзина е измерена на станицата во Штип во 17:00 часот, каде што бил регистриран оркан со максимален удар од 134 km/h со правец запад-северозапад (WNW).
Во Скопската котлина, на метеоролошката станица Скопје, во 16:10 часот е забележан оркански ветер со брзина од 130 km/h од правец север-северозапад (NNW).
Ветер со идентична јачина од 130 km/h е регистриран и во Струмичко, на станицата во Ново Село во 17:50 часот, од правец северозапад (NW).
Од УХМР даваат и стручно објаснување за оваа ретка метеоролошка појава:
„Оркан/ураган според класификацијата за јачина на ветер, претставува ветер чија брзина надминува 118km/h. Тоа е екстремно силен ветер кој на оваа територија се случува многу ретко и предизвикува силни разорувања и значајни штети во пошироки размери.“