Командантот на бригадата на Хамас за северниот дел од Појасот Газа, Издин ал-Бик, е убиен во текот на ноќта во израелски напад врз градот Газа, објавија палестинските медиуми и израелските претставници.
Израелскиот премиер Бенјамин Нетанјаху и министерот за одбрана Израел Кац во заедничка изјава потврдија дека тој бил цел на операцијата на израелската армија (ИДФ), обвинувајќи го за организирање напади врз израелските сили и регрутирање нови борци.
– Ќе продолжиме да ги ловиме и прогонуваме сите терористи на таа организација, од командантите до последниот оперативец, каде и да се кријат, сè додека Хамас не исчезне од Газа, се вели во заедничкото соопштение.
Според палестинските медиуми, нападот бил извршен врз стан во населбата Ал-Наср во градот Газа, каде што животот го загубил Ал-Бик. Од израелската армија (ИДФ) сè уште немаат издадено официјално соопштение по повод оваа воена акција.