Тројца државјани на Северна Македонија се осомничени за кривично дело „оштетување туѓ имот“, извршено минатата недела на подрачјето на Цавтат, соопшти Полициската управа Дубровничко-неретванска.
„По претходно добиени пријави, полициските службеници од Граничната полициска станица Груда утврдија дека на подрачјето на Цавтат со различни налепници со кирилична содржина биле излепени сообраќаен знак, патоказни табли, канти за отпадоци и информативен панел, во толкава мера што ја изгубиле својата функција и намена.
Истиот ден кога полицијата ја примила пријавата биле пронајдени двајца државјани на Северна Македонија, додека третиот осомничен бил пронајден следниот ден, односно во сабота, на 30 мај, на аеродромот.
Станува збор за млади лица на возраст од 23, 25 и 26 години, кои имаат дозвола за престој во Република Хрватска. Тие биле приведени во полициска станица за спроведување криминалистичка истрага, по чие завршување, заедно со кривична пријава за наведеното кривично дело, биле предадени во притворската единица на Полициската управа Дубровничко-неретванска“, се наведува во полициското соопштение, јавува Дубровник.нет.