Министерството за земјоделство, шумарство и водостопанство (МЗШВ) и Владата стартуваат со нова теренска кампања насловена „Гласот кој го слушаме – македонско најдобро“. Министерот Цветан Трипуновски денеска информираше дека целта на оваа иницијатива е директна комуникација со земјоделците, презентација на мерките, но пред сè – слушање на нивните реални проблеми.
Во кампањата се вклучува целиот институционален врв од земјоделскиот сектор. На терен ќе излезат Даниела Иротова од Платежната агенција, Филип Филиповски од АД Водостопанство, Васе Анакиев од Државниот инспекторат за земјоделство, Оливер Миланов од Агенцијата за храна и ветеринарство и Здравко Трајанов од ЈП Национални шуми. Министерот Трипуновски лично ќе предводи еден од тимовите.
„На овие средби ќе се разговара за реалните предизвици со кои се соочуваат македонските земјоделци, ќе се слушнат нивните предлози и идеи, но ќе се презентираат и политиките и мерките за поддршка на македонското земјоделство. Земјоделците ја имаат суштинската улога за државата. Тие не се само производители, тие се двигатели на руралниот развој, чувари на традицијата и клучен фактор за стабилност на домашниот пазар“, истакна Трипуновски.
Тој упати отворен повик до сите земјоделци активно да се вклучат во средбите кои ќе се организираат секоја среда, петок и сабота низ целата држава.
„Ве повикувам сите да се вклучите и да бидете дел од оваа заедничка кампања. Да создадеме подобри услови и посигурна иднина за македонското земјоделство, бидејќи најдоброто од Македонија доаѓа токму од македонските ниви и вредните раце на нашите чесни, работливи земјоделци“, порача министерот во своето обраќање.