Цените на нафтата забележаа пад на светските берзи откако американскиот претседател Доналд Трамп потпиша извршна уредба за укинување на бројни санкции поврзани со Русија, само неколку дена пред нивното официјално стапување во сила.
Според извештаите на светските медиуми, цената на суровата нафта „брент“ утрово на азиските берзи се намали за повеќе од 1,5 отсто, тргувајќи се на ниво од 107,92 долари за барел.
Овој пад доаѓа по краткотрајниот скок во петокот, кога цената на „брентот“ накратко достигна 110 долари за барел за првпат од мај. Тој пораст тогаш беше поттикнат од зголемените тензии и безбедносни закани на Блискиот Исток, кои отворија страв од нарушување на поморскиот сообраќај и глобалното снабдување со енергенси.
Сепак, реакцијата на пазарите уследи брзо откако Трамп потпиша уредба со која се отстрануваат мерките што предвидуваа царини за руска стока и финансиски казни за купување руска нафта и гас, што придонесе за смирување на утринската трговија.