Американскиот претседател Доналд Трамп потпиша извршна наредба со која се воведуваат дополнителни царини за секоја земја која директно или индиректно ја снабдува Куба со нафта. Со овој потег, Вашингтон дополнително го засилува притисокот врз комунистичката власт во Хавана, која веќе се соочува со сериозен недостиг на енергенси.
Трамп изјави дека мерката е донесена за да се заштитат американската „национална безбедност и надворешна политика од малигните дејствија и политики на кубанскиот режим“. Иако не прецизираше кои земји ќе бидат први на удар, наредбата овозможува воведување на т.н. „ad valorem“ давачки врз сите производи кои доаѓаат од државите-добавувачи.
Американскиот претседател деновиве упати и директна порака до раководството во Хавана, оценувајќи ја ситуацијата на островот како критична.
„Куба е многу блиску до пропаст. Тие ги добиваа своите пари од Венецуела, ја добиваа нафтата од Венецуела, но тоа веќе го нема“, изјави Трамп.
По падот на Николас Мадуро во Венецуела, Куба го изгуби својот главен енергетски сојузник. Сега под притисок се наоѓаат и Русија, Мексико и Кина, кои се обидуваат да го пополнат вакуумот во снабдувањето. Трамп ги предупреди сите држави дека секои евентуални контрамерки ќе наидат на одмазда од страна на САД.