Претседателот на САД, Доналд Трамп, соопшти дека го откажал вториот бран напади врз Венецуела откако Каракас се согласи на соработка. Тој истакна дека САД и Венецуела сега добро соработуваат, а големите нафтени компании се подготвени да вложат најмалку 100 милијарди долари во обновата на инфраструктурата.
„Ова е многу важен и паметен гест. САД и Венецуела добро соработуваат, посебно кога станува збор за обнова, во многу поголем, подобар и помодерен облик, на нивната нафтена и гасна инфраструктура. Поради оваа соработка, го откажав претходно очекуваниот втор бран напади, што изгледа нема да е потребен, но сите бродови ќе останат на место поради безбедност“, напиша Трамп на својата социјална мрежа „Truth Social“.
Трамп исто така оцени дека ослободувањето на голем број политички затвореници е знак за „потрага по мир“. Во интервју за „Фокс њуз“, тој најави дека венецуелската опозиционерка Марија Корина Мачадо следната недела ќе го посети Вашингтон, иако претходно ја отфрлаше идејата за соработка со неа, оценувајќи дека „нема поддршка или почитување во земјата“.
Во меѓувреме, американската морнарица заплени танкер во Карипското море во близина на Тринидад. Танкерот „Олина“, кој пловел под лажно знаме на Источен Тимор, претходно испловил од Венецуела и се вратил во регионите каде што беше пресретнат. Ова е петта акција на американската морнарица во последните недели.
По соборувањето на претседателот на Венецуела, Николас Мадуро, САД не дозволуваат бродови и танкери кои се под санкции да влезат или да ја напуштат територијата на јужноамериканските земји-членки на ОПЕК.