Американскиот претседател Доналд Трамп предупреди дека би можел да нареди нови воздушни удари врз Нигерија доколку, како што наведе, продолжи убивањето христијани во таа западноафриканска земја.
Во обемно интервју за „Њујорк тајмс“, Трамп беше прашан дали воздушните удари изведени на Божиќ во северната нигериска сојузна држава Сокото, насочени против исламистички милитанти, се дел од поширока воена кампања.
– Би сакал тоа да биде еднократен удар. Но, ако продолжат да убиваат христијани, тоа ќе бидат повеќекратни удари, изјави Трамп.
Владата на Нигерија претходно ги отфрли обвинувањата на Трамп дека не ги штити христијаните од џихадистички напади, нагласувајќи дека мети на насилството се „муслимани, христијани и лица без верска припадност“.
Организации што го следат политичкото насилство во Нигерија наведуваат дека мнозинството жртви на џихадистичките групи се муслимани, иако во одредени десничарски кругови во САД од минатата година се зборува за наводен геноцид врз нигериските христијани.
Прашан за тие тврдења, Трамп рече дека смета оти „во Нигерија се убиваат и муслимани“, но додаде дека жртвите се „претежно христијани“.
Портпарол на нигерискиот министер за надворешни работи не ја коментираше директно можноста за нови воздушни удари, но изјави дека Нигерија „ќе продолжи со конструктивен дијалог и соработка со партнерите, вклучително и Соединетите Американски Држави, со почитување на меѓународното право и суверенитетот на Нигерија“.
– Нигерија останува посветена на заштитата на сите граѓани, и христијани и муслимани, без дискриминација, изјави Алкасим Абдулкадир.
Нигерија, со повеќе од 230 милиони жители, е приближно рамномерно поделена меѓу христијани, кои претежно живеат на југот, и муслимани, кои главно го населуваат северот на земјата. Североистокот на Нигерија веќе 15 години трпи последици од исламистичкиот бунт на групи како Боко Харам и организации поврзани со таканаречената Исламска држава, пред сѐ во сојузната држава Борно.
Божиќните воздушни удари на САД беа насочени кон два кампа на џихадистичката група Лакурава во претежно муслиманската држава Сокото, на северозападот на Нигерија, во близина на границата со Нигер. Засега нема официјални податоци за можни жртви, бидејќи ниту американските ниту нигериските власти не објавија информации за последиците од нападите.
Нигерискиот министер за надворешни работи Јусуф Маитама Тугар претходно изјави дека станува збор за заедничка операција која „нема никаква врска со религијата“, додавајќи дека таа била одобрена од претседателот на Нигерија Бола Тинубу и спроведена со учество на нигериските вооружени сили. Трамп, пак, наведе дека нападите ги наредил како „божиќен подарок“.