Во рамки на судскиот процес за трагичниот пожар во дискотеката „Пулс“, во кој загинаа 63 лица, Јавното обвинителство денеска изведе нови материјални докази. Презентиран беше фотоалбум со 92 фотографии кои ја прикажуваат состојбата на објектот по пожарот, вклучително и бројни небезбедни услови за евакуација.
Обвинителството истакна дека во објектот биле затекнати горливи материјали како стиропор, первол и дрвени елементи кои го забрзале ширењето на пламенот. Дополнително, биле пронајдени три празни противпожарни апарати.
„Во објектот биле присутни ограничувачки и небезбедни услови за евакуација, меѓу кои преградна двокрилна врата, алуминиумска врата, како и странична врата без рачка, со заклучена брава, метални алки и катанец во заклучена положба“, наведува обвинителството.
Според записникот, пожарот настанал како последица на употреба на пиротехнички средства од страна на групата ДНК. Презентираната неоштетена пиротехничка фонтана покажала дека нејзиниот домет бил поголем од растојанието помеѓу бината и плафонот, кое изнесувало околу 2,7 метри.
Посебен акцент беше ставен на сунѓерот во клубот, набавен во 2012 година, кој при согорување создавал жешки капки. Вакви микротраги биле пронајдени и кај дел од жртвите, вклучително и кај пејачот Андреја Ѓорѓиевски. На неговата јакна биле констатирани траги поврзани со дејството на овој материјал.
Рочиштето започна со тензија откако одбраната побара изземање на вештачењата од Судска медицина, но судот ги одби барањата како неосновани.