Уште едно дете им подлегна на повредите по тешката сообраќајна несреќа што утрово се случи во германскиот град Динслакен, каде автомобил удри во група ученици кои оделе кон училиште. Според последните информации, состојбата е критична по оваа нова трагедија што ја потресе земјата.
Несреќата се случила околу 7:45 часот на Хагенштрасе, во регионот Рур во германската покраина Северна Рајна-Вестфалија. Три 12-годишни деца кои се возеле со велосипед кон училиште се потешко повредени во несреќата, додека едно поминало со полесни повреди.
Според полицијата, зад воланот на автомобилот „Фолксваген“ била 47-годишна жена од Динслакен. Таа од сè уште нејасни причини одеднаш свртела лево и челно удрила во групата деца.
„Жената се судрила со три деца на велосипеди кои доаѓале од спротивната насока, а потоа и со три паркирани автомобили“, се вели во соопштението на истражителите.
Германските медиуми пренесуваат дека силината на ударот била огромна, при што детските велосипеди биле целосно уништени и искршени на парчиња.
На местото на настанот веднаш пристигнале бројни екипи на брза помош и полиција, а повредените 12-годишници итно биле пренесени во блиските болници. Поради сериозноста на нивната состојба бил повикан и хеликоптер на брзата помош, кој на крајот сепак не бил употребен од засега непознати причини.
Јавното обвинителство информираше дека возачот на автомобилот исто така претрпел сериозни повреди и е хоспитализиран.
Полициски тимови со часови го обезбедуваа местото на трагедијата и собираа докази, а истрагата за точните причини за несреќата е во тек.