Страшно злосторство го потресе австрискиот град Леобен, во сојузната покраина Штаерска, каде според првичните информации од истрагата, мајка му го одзела животот на своето дванаесетгодишно дете. Како што пренесуваат локалните медиуми, детето било избодено со нож во станот каде што живееле.
Итните служби примиле повик за интервенција денеска околу 15 часот, по што веднаш се упатиле кон местото на настанот. Во станот, кој се наоѓа во непосредна близина на болницата ЛКХ Леобен, полицијата и лекарите го пронашле момчето со тешки убодни рани во пределот на вратот. И покрај сите напори на медицинскиот персонал, за дванаесетгодишникот немало спас и била констатирана смрт.
При полицискиот увид, во станот била пронајдена и мајката, која исто така имала повреди. Истрагата веднаш ја презеде Покраинската криминалистичка полиција, која на местото на злосторството испрати специјализиран тим за вештачење.
Засега надлежните не соопштуваат дополнителни детали за околностите кои довеле до оваа трагедија, ниту пак информации за мотивот на делото. Исто така, сè уште нема официјална потврда за евентуално приведување на осомничената мајка, со оглед на тоа што и таа била затекната со повреди.