Во Делчево и поширокиот регион во тек се повеќе значајни проекти за реконструкција и изградба на патна инфраструктура финансирани од Јавното претпријатие за државни патишта. Обиколка на теренот каде се извршуваат проектите денеска изврши директорот на ЈПДП, Коце Трајановски, заедно со стручен тим и заменик-директорот Александар Шуковски.
-Се санираат делови од патиштата Р1302 (кон Пехчево) и Р2341 (кон село Габрово), како и девијацијата кај Црквенска река. За реконструкција на патот Р1302 се издвоени 20 милиони денари за поставување нов асфалт на површина од 10.200 м². За патот Р2341 се инвестираат 22 милиони денари за санација на 12.500 м² коловоз и банкини. За девијацијата кај Црквенска река се предвидени 6 милиони денари, а дополнително се изработува и проект за санација на мостот на овој потег, истакна Трајановски.
Изведувач на градежните активности е ЈП „Македонијапат“, а вкупната инвестиција за 2025 година во овие три проекти изнесува 48 милиони денари.
Трајановски најави дека годинава ЈПДП во овој регион планира да инвестира уште 155 милиони денари во реконструкцијата на делницата Звегор – граничен премин со Бугарија на патот А3.
Како што посочи Трајановски, станува збор за 5,3 километри пат кој е во многу лоша состојба и кој наскоро, во текот на есента, ќе започне да се рехабилитира и ќе добие нов лик. Интервенцијата предвидува целосно стругање на постојниот асфалтен коловоз и поставување на нов асфалт, и тоа околу 31.000 м² прв слој и околу 55.000 м² завршен слој. Дополнително е предвидено изведување работи за растеретување од нестабилен карпест материјал, ќе се постави заштитна челична мрежа и целосно ќе се обнови патната сигнализација.
-Безбедноста и квалитетот на патиштата се наш приоритет. Со овие инвестиции значително ќе се подобри патната инфраструктура во регионот и ќе се обезбеди побезбедно и поквалитетно патување за сите граѓани, изјави Трајановски при посетата на Делчево.