Поранешниот директор на Управата за водење матични книги и висок кадар на ДУИ, Бујар Дарлишта, е меѓу приведените во големата ноќна акција на Бирото за јавна безбедност (БЈБ). Информацијата за неговото приведување ја потврди министерот за внатрешни работи, Панче Тошковски.
Акцијата е спроведена на повеќе локации во Скопје и Куманово, под раководство на Обвинителството за гонење организиран криминал и корупција (ОЈО ГОКК).
„Полициски службеници од Одделот за сузбивање на организиран и сериозен криминал од ноќеска спроведуваат активности поради постоење основано сомневање за сторени кривични дела од финансиско економска природа“, соопштија од ОЈО ГОКК.
Министерот Тошковски ја потврди веста за време на денешниот настан во Центарот за обука на МВР, најавувајќи дека повеќе детали за случајот ќе бидат соопштени по комплетирање на сите теренски активности.