Министерот за внатрешни работи, Панче Тошковски, денеска потврди дека се води интензивна истрага за случајот со врсничкото насилство во скопската населба Ѓорче. Тој информираше дека досега на разговор се повикани 14 лица, меѓу кои и родители на ученичките, а во координација со Јавното обвинителство се преземаат соодветни процесни дејствија.
„Ова е сериозен проблем кој нè засега сите и кој ќе остане во фокусот на Министерството за внатрешни работи. Потребен е мултиинституционален и системски пристап. Апсолутно значајна е и улогата на родителите – нивната вклученост во воспитувањето и образовниот процес“, изјави Тошковски.
Министерот нагласи дека борбата против врсничкото насилство не смее да се сведе само на репресија, туку бара општествен ангажман од сите чинители.
Покрај врсничкото насилство, Тошковски најави и суштински промени во справувањето со семејното насилство. Тој информираше дека МВР работи на зајакнување на ингеренциите во согласност со Истанбулската конвенција, со примарен фокус кон сторителот, без оглед на неговиот статус или местото на извршување на делото.
Во однос на останатите актуелни прашања, министерот посочи дека инспекциските служби активно работат на случајот со нелегални козметички третмани, а во однос на државјанствата на функционерите, го повтори ставот дека е потребна анализа од формално-правен аспект за воведување правило за едно државјанство.