Друштвото на писателите на Македонија (ДПМ) денеска со длабоко жалење и огромна тага ја соопшти веста за прераното заминување на Тихомир Јанчовски (1967). Јанчовски беше истакнат поет, писател, преведувач, професор, музичар и издавач, кој зад себе остави богато творештво.
Како автор потпишува над триесет книги, пред сè поезија, преводи и поетски романи. Меѓу неговите дела се издвојува и историскиот труд „Историја на православното монаштво на територијата на денешна Република Македонија“ (2010). Неговата поезија ги надмина границите на државата – четири негови книги се преведени на странски јазици, а избори од неговото творештво се објавувани на англиски, француски, германски, италијански, руски и многу други јазици.
Освен по пишаниот збор, Јанчовски ќе остане запаметен како еден од најомилените наставници на повеќе генерации средношколци. Со својата автентичност и креативност, тој остави траен белег како предавач во гимназијата „Орце Николов“, во меѓународното училиште „Нова“ и во Американската гимназија во Скопје.