Талески: ВМРО-ДПМНЕ ја поткопува работата на институциите за дојавите со бомби

ВМРО-ДПМНЕ ја попречува работата на институциите во спроведување на мерките за справување со дојавите за поставени бомби во училиштата, обвини пратеникот на СДСМ, Миле Талески.

„Јавните настапи на претставници од ВМРО-ДПМНЕ, како, на пример, Весна Јаневска, која повикува на непочитување на новите протоколи, е директно поткопување на дејствувањето на надлежните институции во борбата против хибридните напади. Безбедносна на учениците и обезбедувањето непречен образовен процес се најважни и новите протоколи за постапувањето, изработени од експерти, се во оваа насока.

Благодарение на таквиот пристап веќе четири дена наставата се одвива без прекин, а безбедноста на учениците и наставниците е загарантирана. Обезбедено е и соодветно присуство на полицијата во училиштата. Она што загрижува и што отвора сериозни сомнежи е деструктивното однесувањето на ВМРО-ДПМНЕ директно поврзани со поткопување на работата на институциите.

Како пратеник и претседател на Комисијата за одбрана и безбедност имам обврска пред граѓаните, но и пред Собранието, да реагирам јавно. Министерството за внатрешни работи има сознанија за тоа од каде доаѓаат дојавите, а освен од трети земји, некои од нив се и од македонска територија. Однесувањето на ВМРО-ДПМНЕ отвора сериозен сомнеж за нивната улога. Дали ВМРО-ДПМНЕ на некаков начин е поврзаната со внатрешните соработници?“, рече Талески.

Тој праша дали ова се причините за вакво деструктивно постапување на ВМРО-ДПМНЕ, партијата, која, како што рече, е во целосно заложништво на Левицата.

Талески смета дека ВМРО-ДПМНЕ со крајно неодговорно однесување застанува зад хибридните напади, чија цел, како што објасни, е создавање немир, тензии, недоверба и чувство на страв кај граѓаните.

„Ова не е и не смее да биде тема за дневна политика, се работи за безбедноста на училиштата и наставниот процес. ВМРО-ДПМНЕ треба да престане да ја опструира и поткопува работата на институциите, кои работат на обезбедување целосна безбедност на децата, на неутрализација на проблемот и овозможување непречена настава“, порача Талески.