Иран доставил предлог да ја прекине контролата врз стратешкиот Ормуски теснец во замена за укинување на американската блокада и прекинување на воените дејствија. Според двајца регионални функционери кои сакаа да останат анонимни поради чувствителноста на процесот, понудата предвидува дискусиите за иранската нуклеарна програма да се одложат за подоцнежна фаза.
Понудата до Американците ја пренеле пакистански дипломати за време на разговорите одржани овој викенд, а веста првично ја објави порталот Аксиос (Axios), пренесува АП.
Аналитичарите проценуваат дека е малку веројатно американскиот претседател Доналд Трамп да прифати ваков предлог. Одложувањето на нуклеарните преговори би ги оставило нерешени клучните несогласувања што доведоа до војната меѓу САД и Израел од една страна и Иран од друга. Самиот Трамп повеќепати нагласи дека спречувањето на Иран да развие нуклеарно оружје е една од главните причини за воениот конфликт.
Во моментов владее кревок прекин на огнот, но двете страни се во ќор-сокак околу Ормускиот теснец – клучна рута низ која во мирно време минува една петтина од светската трговија со нафта и гас.
Американската блокада има за цел да го спречи Иран да продава нафта, лишувајќи го од клучни приходи и ставајќи го во ситуација да мора да го запре производството поради недостиг на капацитети за складирање. Од друга страна, иранското затворање на теснецот врши огромен притисок врз САД и сојузниците од Заливот. Ова резултираше со нагло зголемување на цените на нафтата и гасот, што е особено критично за Трамп пред клучните среднорочни избори.
Економските последици од блокадата се глобални. Цените на нафтата постојано растат, а десетици танкери со сурова нафта се заробени во Заливот. Денеска, цената на суровата нафта Брент се движеше околу 108 долари за барел, што е за речиси 50 проценти повисоко отколку на почетокот на војната. Поскапувањето се прелева и врз цените на ѓубривата, храната и другите основни производи ширум светот.
Информацијата за иранската понуда доаѓа паралелно со посетата на иранскиот министер за надворешни работи на Русија, долгорочен сојузник на Техеран, иако останува нејасно каква конкретна помош би можела да понуди Москва во овој момент.