Легендарниот бразилски фудбалер и централен дефанзивец Херкулес Брито Руас почина во четвртокот на 86-годишна возраст.
Тажната вест официјално ја потврди Бразилската фудбалска конфедерација (CBF), од каде што не соопштија дополнителни детали околу причините за смртта.
Брито беше еден од клучните столбови во одбраната на историската генерација на „Селесао“ која во 1970 година во Мексико се искачи на врвот на светот.
Во периодот меѓу 1964 и 1972 година, тој одигра вкупно 61 натпревар за националниот тим, настапувајќи и на Мундијалот во 1966 година.
На шампионатот во Мексико, тој формираше стабилен одбранбен тандем со Вилсон Пјаца, играјќи зад легендарните Пеле, Јержиња и Тостао.
Претседателот на Бразилската фудбалска конфедерација, Самир Чауд, се збогуваше со легендарниот фудбалер и потсети на неговото големо значење.
„Брито нè остави како еден од најголемите дефанзивци во историјата на бразилскиот фудбал. Неговиот придонес во победата на Светското првенство во 1970 година ќе биде запаметен засекогаш“, изјави претседателот на конфедерацијата, Самир Чауд.
Покрај светската титула, Брито во својата богата репрезентативна кариера ги освои и трофеите во Копа Рока во 1971 и Копа де ла Индепенденсија во 1972 година.
Претседателот Чауд испрати порака и до актуелната генерација пред нивниот настап на претстојниот фудбалски Мундијал.
„Му оддавам почит на овој идол на нашата земја. Нека неговиот борбен дух биде инспирација за нашите играчи кои ќе се натпреваруваат на претстојното Светско првенство“, додаде Чауд.
Бразилската репрезентација во моментов се подготвува за својот прв настап на Светското првенство, каде во сабота ќе ги одмери силите против селекцијата на Мароко.